Aadhaar Card Update Last Date 2026: Agar aapne pichle 10 saalon mein apna Aadhaar card kabhi update nahi karwaya hai, toh yeh khabar aapke liye bahut zaroori hai. UIDAI (Unique Identification Authority of India) ne Aadhaar ko muft (Free) mein online update karne ki suvidha di hui hai, lekin iski ek deadline hai. Agar aapne 14 June 2026 tak yeh kaam nahi kiya, toh aapko apni jeb dhili karni pad sakti hai.
10 saal purana Aadhaar hai toh ho jayein saavdhan
UIDAI ke mutabik, jin logo ke Aadhaar card 10 saal pehle bane the aur tab se ab tak ek baar bhi update nahi huye hain, unhe apne Proof of Identity (PoI) aur Proof of Address (PoA) documents ko phir se re-validate karwana zaroori hai. Yeh kadam Aadhaar fraud ko rokne aur aapki details ko sahi rakhne ke liye uthaya gaya hai.
14 June ke baad kitna lagega charge?
Filhaal, myAadhaar portal ke zariye online document update karna bilkul free hai. Lekin 14 June 2026 ki deadline khatam hone ke baad, is service ke liye UIDAI fees le sakta hai.
- Online Update Fee: ₹25 se ₹50 tak ho sakti hai.
- Offline (Aadhaar Center): Agar aap kisi kendra par jaakar update karwate hain, toh wahan pehle se hi ₹50 ka charge lagta hai.
Kaun-kaun se documents ki hogi zaroorat?
Aapko do mukhya documents ki zaroorat padegi:
- Pehchan ka Praman (PoI): Voter ID, PAN Card, Passport, ya Driving License.
- Pate ka Praman (PoA): Ration Card, Electricity Bill (3 mahine se purana na ho), ya Bank Passbook.
Ghar baithe Free mein kaise update karein? (Step-by-Step)
Agar aap paise bachana chahte hain, toh in steps ko follow karein:
Step 1:- Sabse pehle UIDAI ki official website myaadhaar.uidai.gov.in par jayein.
Step 2:- Apne Aadhaar number aur registered mobile par aaye OTP ki madad se login karein.
Step 3:- Dashboard par ‘Document Update’ ke option par click karein.
Step 4:- Ab aapki screen par aapki maujooda details (Naam, Pata, Janm tithi) dikhayi dengi. Inhe verify karein aur ‘Next’ par click karein.
Step 5:- Ab apne Identity Proof aur Address Proof ki scanned copy (JPEG, PNG ya PDF) upload karein.
Step 6:- Submit button par click karein. Aapko ek URN (Update Request Number) milega, jisse aap baad mein status check kar sakte hain.
Note: Yaad rakhein ki yeh free suvidha sirf online portal par hi uplabdh hai. Agar aap biometric update (photo, iris ya fingerprint) karwana chahte hain, toh aapko Aadhaar center hi jaana hoga aur wahan nirdharit fees deni hogi.
